Era Lei der occitan, aranés en Aran, desvolope er article 6.5 que ditz qu’era lengua occitana, denominada aranés en Aran, ei era lengua pròpria d’aguest territòri e ei oficiau en Catalonha. Era lei siguec aprovada en Parlament de Catalonha eth 22 de seteme de 2010, per ua majoria fòrça ampla de 117 vòts favorables, damb un important lideratge d’ERC. I a un cèrt retard en desvolopament dera Lei e calerie accelerar. E, totun, èm en plen desvolopament der article 4.3 qu’obligue a estructurar era Acadèmia catalana dera lengua occitana.

Era metuda en marcha d’aguesta institucion ei assomida de forma compartida entre eth Conselh Generau d’Aran e era Generalitat de Catalonha. Serà era continuitat der actuau Institut d’Estudis Aranesi, organ assessor deth Conselh Generau d’Aran. Aguest IEA aurà de reconvertir-se damb ua estructura academica e damb ua clara independéncia des poders publics, sociaus,... Era sua finalitat ei era d’èster autoritat lingüistica dera variant aranesa der occitan, damb continua referéncia ath tronc occitan comun a tot eth territòri.

Eth dissenh dera naua Acadèmia contemple dues seccions; era ua composada pes persones mès coneishedores dera varianta e era auta que trebalharà ena lengua referenciau, damb es persones mès expèrtes en lengua occitana, de tot eth territòri lingüistic. Damb eth Decret qu’a de méter lèu lèu en foncionament aguesta estructura, era Generalitat artenherà a recuperar eth temps perdut ena implementacion dera Lei der occitan e a crear ua estructura (d’Estat) damb clares connotacions europees.

Jusèp Loís Sans Socasau
President de EROC (Esquèrra Republicana Occitana)