Eth passat 17 de noveme, eth DOGC, publicaue era resolucion d’inscripcion en registre d’Acadèmies de Catalonha der Institut d’Estudis Aranesi-Acadèmia aranesa dera lengua occitana. Ei ua grana oportunitat entà tota era lengua occitana e en concrèt entara sua variant aranesa.

En 2006 damb era declaracion estatutàri dera oficialitat der occitan en tota Catalonha, se produïc eth prumèr miracle, des causes soniades que prenen vida: era legendària e extraordinària lengua des trobadors se hège oficiau en ua Catalonha que s’identifique internacionaument peth sòn respècte as identitats. Eth segon miracle, des causes impossibles que se tornen reals, arribaue en gèr de 2014 damb era publicacion deth Decret que cree era Acadèmia dera lengua occitana. E ara eth pas finau qu’ei era inscripcion dera acadèmia en registre d’Acadèmies de Catalonha. Aguesta ei era prumèra e soleta Acadèmia (regim juridica d’acadèmia) dera Lengua Occitana, ei era unenca acadèmia de Catalonha damb era sedença dehòra de Barcelona e era soleta acadèmia qu’ei plaçada en territòri occitan.

Er occitan e era sua variant er aranés guanhen pes, milhoren eth sòn dimensionat maugrat es granes contrarietats que patís ena rèsta d’Euròpa. Eth 3 de juriòl d’enguan 15 persones deth mon dera promocion e der estudi dera lengua occitana, designades pera Generalitat de Catalonha e peth Conselh Generau d’Aran, constituírem er Institut d’Estudis Aranesi-Acadèmia aranesa dera lengua occitana damb era finalitat d’èster autoritat dera variant aranesa, aconselhadora dera lengua occitana en generau e de collaborar en progrés e desvolopament dera lengua e dera societat.


Jusèp Loís Sans Socasau
President en funcions der IEA-AALO